මේ මාස හයට මාරාන්තික අනතුරු දහයකට වඩා මේ පාරේ වෙලා තියෙනවා ඒකට මුලික හේතුව රියැදුරන්ගෙ වැරැදි නොවේ..පාරේ තියෙන අබලන් තත්ත්වය. ඒත් ජීවිතවලින් වන්දි ගෙවන්න වෙලා තියෙන්නේ අපිට.. ඇත්තෙන්ම මේ ගැන ගම්වැසියෙක් විදිහට ලොකු දුකක් තියෙන්නෙ.
කඩවත මංසංධියේ පිහිටා ඇති බෝධිය අබියසින් ඇරැඹෙන මාර්ග 222 මාර්ගය රාගම නගරයට නුවර පාර සම්බන්ධ කරන ප්‍රධාන මාර්ගයයි. රාගම නගරය පසුකර මහබාගේ නගරයෙන් කොළඹ මීගමුව මාර්ගයට යාවන මෙම මාර්ගය අද වන විට අතිශය කාර්යබහුල සහ වැඩිම වාහන ප්‍රමාණයක් ධාවනය වන මාර්ගයක් ලෙස හඳුනාගෙන තිබේ. මෙම මාර්ගයේ තදබදය අධික වීමට හේතු බවට පත්ව ඇත්තේ උතුරු කොළඹ මහ රෝහල හැඳල කෙරවලපිටිය ආදී ප්‍රදේශවල ඇති කාර්මාන්ත ශාලා වෙත යන බර වාහනයි. එමෙන්ම ගුවන්තොටුපොළ වෙත යන වාහනද මේ පාරේ ගමන් කරයි. මේ සියල්ල නිසා ගම්පහ දිස්ත්‍රික්කයේ ප්‍රධාන මාර්ගයක් බවට කඩවත රාගම හරහා මහබාගේ මාර්ගය පත්ව ඇති අතර ඒ නිසාම මෙම මාර්ගයට විශාල වැදගත්කමක් ලැබි තිබේ. මෙම මාර්ගය යළි කාපට් අතුරා ප්‍රතිසංස්කරණය කළේ වසර කිහිපයකට පෙරය. එසේ කාපට් කිරීම නිසා මෙම මාර්ගයේ තිබූ තදබදය සම්පූර්ණයෙන්ම වාගේ නැති වු අතර රියැදුරන් සහ මගීන් ඒ ගැන දැඩි සතුට පළ කළහ. එහෙත් එම සතුට සහ ප්‍රසාදය පැවැතියේ වසරකටත් අඩු කාලයකි. එයට හේතු වුයේ අලුතින් ප්‍රතිසංස්කරණය කළ මෙම මාර්ගයේ ජල නළ ඇතිරීම නිසා මාර්ගයේ දීර්ග කඩතොලු වීමක් සිදුවීමය. අඩි හතරක් පමණ පළල මෙම කඩතොලු කිරීම රාගම නගරයට ආසන්න දෙල්පේ හන්දියේ සිට කඩවත කිට්ටුවට එන තෙක් පවතින අතර එහි ප්‍රතිඵලයක් ලෙස මෙම මාර්ගය භාවිතා කරන රියැදුරන් දැඩි අපහසුතාවට පත්ව සිටී. එසේ අපහසුතාවට පත්ව ඇති රියැදුරන් අතර ප්‍රමුඛ පිරිස බවට පත්ව සිටින්නේ ත්‍රිරෝද රථ රියැදුරන් සහ යතුරුපැදිකරුවන්ය. ඇත්තෙන්ම ඔවුන් අද සිදු කරන්නේ වාහන ධාවනයක් නොව මරුවා සමග තරගයකි. මෙම පයිප්ප එළිමෙන් පසු මාර්ගය නිසි ලෙස ප්‍රතිසංස්කරණය නොවීම නිසා පසුගිය මාස හය තුළ යතුරු පැදි අනතුරු සහ ත්‍රිරෝද රථ අනතුරු රැසක් සිදුව ඇති අතර එයට හේතුව ලෙස රියැදුරන් සඳහන් කරන්නේ මාර්ගය පෙර පරිදි ප්‍රතිසංස්කරණය කර නිසි ප්‍රමිතියක් ඇති නොකළ නිසා සිදුවන අනතුරු බවය. ඔවුන් සඳහන් කරන ආකාරයට පැයට කිලෝ මීටර් තිහ ඉක්මවා ධාවනය කිරීමත් සමග වාහන රියැදුරු පාලනයෙන් ගිලිහී යයි. මේ ගැන පසුගිය කාලය තුළ විවිධ තැන්වලට පැමිණිලි කළද මෙතෙක් කිසිදු විසඳුමක් නොව අවධානයක් හෝ යොමු වී නැත.
කඩවත සිට රාගම දක්වා නිරීක්ෂණය කළ අපට එහිදී අපට දැක ගැනීමට ලැබුණේ මාර්ගයේ තත්ත්වය වඩාත් බැරෑරුම් බවය. එහි ප්‍රතිඵලය බවට පත්ව තිබෙන්නේ වාහන සෙමෙන් ධාවනය සහ මාර්ගය මැදට වන්නට ධාවනය කිරීම නිසා අධික තදබදයක් ඇති වීමය. විවිධ ප්‍රදේශවලින් උතුරු කොළඹ රෝහලට නිතර ගිලන් රථ ගමන් කරන මාර්ගයක් වීම නිසා මෙම තදබදය විශාල ගැටලුවක් බවට පත්ව තිබේ. එහෙත් මේ ගැන මෙතෙක් කිසිදු අවධානයක් යොමු වී නැතිවීම ප්‍රශ්නාර්තයකි.
මෙවැනි මාර්ග ප්‍රතිසංස්කරණ කිරීම් සිදු කරද්දී මහා මාර්ග දෙපාර්තමේන්තුව සහ ජලාපවාහන දෙපාර්තමේන්තුව වැනි සමගාමී ආයතන අවබෝධයෙන් යුතුව කටයුතු කිරීම වඩාත් සුදුසු දෙයක් වුවද එවැනි තත්ත්වයක් බොහෝ විට දැක ගැනීමට නොහැකිය.
මේ තත්ත්වය පිළිබඳව කඩවත රාගම මාර්ගය නිතර පරිහරණය කරන රියැදුරන්ගෙන් අපි විමසීමක් ක‍ෙළමු. එහිදී ඔවුන් අප වෙත විවිධ ප්‍රතිචාර පළ කළ අතර එම ප්‍රතිචාර අතර ප්‍රධානම කරුණ බවට පත්ව තිබුණේ මාර්ග ආශ්‍රිතව ජල නළ එළීම වැනි ප්‍රතිසංස්කරණ හොඳ දේ වුවද ඒවා කිරීමේදි මීට වඩා සැලසුම් සහගත බවක් සහ අවබෝධයක් තිබිය යුතු බවය.
එහිදී අප සමග මුලින්ම කතා කළේ ත්‍රිරෝද රථ රියැදුරෙකු වන කේ ඩී එස් ආනන්ද මහතාය.
“ අපි තරම් මේ ප්‍රශ්නයෙන් දුක් විඳින පිරිසක් නැහැ.කතාවක් තියෙනවා අතුරේ යනව වගේ කියල අන්න ඒ කතාව අපිටත් අදාළයි අපිත් අතුරෙ යනවා වගේ ගමනක් යන්නේ. සාමාන්‍ය විදිහට ගියොත් මෙතැන ඉඳන් කඩවතට විනාඩි දහයක් යන්න යන්නේ. ඒත් පාරේ අබලන් කම නිසා අපිට වෙලාවකට පැය බාගයකට වැඩිය කාලයක් යනවා. අපි හයර් එකක් දුවල තමයි පවුලක් ජීවත් කරන්නෙ මේ තත්ත්වය නිසා අපිට විශාල මුදලක් අහිමි වෙනවා.
මම කියන්නේ නැහැ පාරවල් හදන්න එපා කියලා ඒත් හොඳ පාරක් කැඩුවට පස්සේ තිබුණ තාලෙටම හදන්න ඕනැ..ඒත් මේ පාර හදද්දි එහෙම කරල නැහැ..“
ආනන්ද මහතා මෙන්ම මහේෂ් මහතාද වෘත්තීය ත්‍රිරොද ධාවකයකි. මේ ඔහු අප සමග දැක්වූ අදහස්ය.
“ ඊයෙත් ඇක්සිඩන්ට් එකක් වුණා. තරුණ ළමයෙක්ට බරපතළ තුවාල වුණා අපි හොයල බැලුවා මොකද කියල හේතුව එතකොට තමයි ආරංචි වුණේ බයිසිකලය ලෙස්සල ගිහින් මේ අනතුර වුණේ කියලා ඇත්තෙන්ම මේක මහ අපරාධයක්..මම හිතනවා පාර හරියට තිබුණනම් මේ තත්ත්වය උදාවෙන්නේ නැහැ කියල..“
පැමිණිලි කර තියෙනවා අපි බලය තියෙන අයට ඒ අය කියන්නේ ජල නළ එළීම සම්පුර්ණ වුණාට පස්සේ තමයි කියල පාර සම්පුර්ණයන් ප්‍රතිසංස්කරණය කරන්නේ කියලා. එතකම් අපිට වෙලා තියෙන්නේ ජීවිත පරදුවට තියල පාරේ යන්න.
මෙම මාර්ගය පාවිච්චි කරන යතුරුපැදි කරුවකු වන දනුෂ්ක මහතා තමන් මුහුණ දෙන අත්දැකීම් පිළිබඳව දක්වන්නේ මෙවැනි ප්‍රතිචාරයකි.
“ත්‍රිවිල් අනෙක් වාහන වගේ නොවෙයි බයිසිකල්වලට මේ කඩතොලු තත්ත්වය වැඩියෙන් බලපානවා..ඒ තත්ත්වය නිසා මාව ඊයේ අනතුරිකින් බේරුණේ අනුනවයෙන්. මම විතරක් නොවෙයි බයිසිකල්වල යන එන අය ගොඩක් අනතුරුවලට මුහුණ දෙනවා. ඒ ගැන බලන්න කෙනෙක් නැහැ. මම ඉතාමත් කරුණාවෙන් ඉල්ලා සිටිනවා අපේ මේ ප්‍රශ්නය විසඳා දෙන්න කියල.“
මම දන්න විදිහට මේ මාස හයට මාරාන්තික අනතුරු දහයකට වඩා මේ පාරේ වෙලා තියෙනවා ඒකට මුලික හේතුව වෙන්නෙ රියැදුරන්ගෙ වැරැදි නොවේ..පාරේ තියෙන අබලන් තත්ත්වය. ඒත් ජීවිතවලින් වන්දි ගෙවන්න වෙලා තියෙන්නේ අපිට.. ඇත්තෙන්ම මේ ගැන ගම්වැසියෙක් විදිහට ලොකු දුකක් තියෙන්නෙ.
රාගම සහ දෙල්පේ හන්දිය අතර ජංගම වෙළෙඳසලක් පවත්වා ගෙන යන ලාල් මහතා උදේ හවස සිය කුඩා ලොරිය මේ පාරේ ධාවනය කරයි.
“ මම ඉතාමත් අමාරුවෙන් මේ පාරෙ යන්නෙ ගැස්සෙනවා නැතිනම් වාහනය පාලනයෙන් ගිලිහෙනවා ඒකට හේතුව හොයද්දි මට තේරුනේ පාරේ තියෙන තත්ත්වය කියලා. මම ගැන කතා කරනවා විතරක් නෙමෙයි අනෙක් අය ගැනත් කතා කරන්න ඕනැ මේ පාරේ බබාල හම්බවෙන්න ඉන්න අම්මලා , ලෙඩ්ඩු විශාල ප්‍රමාණයක් යනවා මේ අය මොන තරම් අපහසුතාවට පත්වෙනවා ඇද්ද..ඇත්තෙන්ම මේ ගැටලුව කල් නොයවා විසඳා දෙන්න කියල මම ඉල්ලා සිටිනවා..“ එසේ අපට තම අදහස ඉදිරිපත් කළේ ලාල් මහතාය.
අපට හමුවූ නෙළුනි මහත්මියද අපෙන් ඉල්ලා සිටියේ මේ ගැන බලධාරීන්ගේ අවධානය යොමු කරවන ලෙසය. ඇත්තෙන්ම කඩවත රාගම හරහා මහබාගේ වැනි ප්‍රධාන මාර්ගයක් මේ ආකාරයට දීර්ගකාලීනව පැවැතීම කනගාටුදායකය.එයට නිසි විසඳුමක් කඩිනමින් ලබා දීම බලධාරීන්ගේ යුතුකමකි.
ජායාරූප - රංජිත් අසංක
නව අදහස දක්වන්න