රනිල් වික්රමසිංහ මහතා අග්රාමාත්ය ධුරයේ යළි වැඩ බාරගැනීම සහ මහින්ද රාජපක්ෂ මහතා විපක්ෂ නායක ධුරයට පත්වීම, ටී.එන්.ඒ. සංවිධානය පිළිබඳ දකුණේ ඇති විවිධ අදහස්, පසුගිය දින කිහිපයේ රට මුහුණ දුන් තත්ත්වයෙන් මුදා ගැනීම සඳහා ව්යවස්ථාදායකය විධායකය සහ විපක්ෂය ගතයුතු පියවර අද අදහස් දෙකට විෂයවේ.
රනිල් වික්රමසිංහ මහතා අගමැති ධුරයේ නැවත දිවුරුම් දුන්නා. මහින්ද රාජපක්ෂ මහතාට විපක්ෂයට යන්න වුණා. මේ තත්ත්වය ඔබ දකින්නෙ කොහොමද?
ශ්රේෂ්ඨාධිකරණය තීන්දුවක් දුන්නා. හැබැයි මහින්ද රාජපක්ෂ මහත්තයට අගමැතිකමෙන් අස්නොවී ඉන්නත් තිබුණා. පාර්ලිමේන්තුවෙ බහුතරය ඇතැයි ජනාධිපතිට හිතෙන කෙනාට ව්යවස්ථාව අනුව අගමැතිකම දෙන්න පුළුවන්. බහුතරය පෙන්වන්න ඕන කියල කොහෙවත් නැහැ. ජනාධිපතිතුමා පාර්ලිමේන්තු සම්ප්රදාය ගරුකරනව කියලයි කිව්වෙ.
විධායකයට තිබෙන බලය පාවිච්චිකරල, පාර්ලිමේන්තු බහුතරය නැති කෙනෙකුට අගමැතිකම දෙන්න පුළුවන්ද?
2015 මෛත්රීපාල සිරිසේන ජනාධිපතිතුමා දිවුරුම් දීපු ගමන් දි. මු. ජයරත්න මහත්තය ඉන්දැද්දිම රනිල් වික්රමසිංහ මහත්තය අගමැති කළා. එතකොට බහුතරය තිබුණෙ නැහැ. ඒක ජනාධිපතිගෙ කැමැත්ත. මහින්ද මහත්තය වගේ ජනප්රිය චරිතයක් පැරදුනා කියන්නෙ ඇත්තටම ජනමතය ඒ වෙලාවෙ වෙනස් වෙලා. ඒ වගේම කට්ටියක් රනිල් වික්රමසිංහ මහත්තයත් එක්ක එකතුවෙලා බහුතරය පෙන්නුවා. මහ මැතිවරණයකින් ගන්න ජනමතය නියතව තියෙන්නෙ නැහැ, වෙනස් වෙනවා. ජනාධිපතිතුමා එහෙම උපකල්පනයක් කළා.
ඒ උපකල්පනය නිසා රට අස්ථාවර වුණා නේද?
එතන පොඩි ව්යාකූල බවක් තියෙනවා. මොකද... පාර්ලිමේන්තුවෙ සැබවින්ම තියෙන මතයට අනුව නෙවෙයි පත්කරන්නෙ. පහුගිය ප්රාදේශීය සභා මැතිවරණයට තරග වැදුෙණ ප්රාදේශීය සභා මැතිවරණයක් විදියට නෙවෙයි හැම පක්ෂයම අභියෝග කළේ බලයට. එතනින් ජනමතයක් නියෝජනය වුණා. එක්සත් ජාතික පක්ෂයෙ ජනබලය අඩුවුණා. පොහොට්ටුව වැඩි බලයක් පෙන්නුව. පාර්ලිමේන්තුවෙ අද තියෙන්නෙ සැබෑ ජනමතය නෙවෙයි. මම විධායක ජනාධිපති ක්රමයට කැමැතියි. යුද්ධය අවසන් කළේ මේ ක්රමය හින්ද. කැබිනට් එක නැතුවත් ජනාධිපතිතුමා දවස් 51ක් රට පාලනය කළා. ජනාධිපති ක්රමය තියෙන හැම රටක්ම ස්ථාවරයි.
මහින්ද රාජපක්ෂ මහත්තය අගමැතිකම අතහරින්නෙ රට ස්ථාවර කරන්න කියලයි. දැන් ඔහුගෙ කාර්යභාරය වෙන්න ඕන මොකක්ද?
දැන් විපක්ෂයෙ කාර්යභාරය කරන්න ඕන. එක්සත් ජනතා නිදහස් සන්ධානය ජාතික ආණ්ඩුවෙ නැහැ. ඒ හින්ද ඔවුන්ට ඒ වගකීම තියෙනවා.
රටේ පැවති දේශපාලන අස්ථාවරත්වය නිවැරදි කරන්න අධිකරණයටත් මැදිහත්වෙන්න වීම ගැන මොකද කියන්නෙ?
රටේ ඉහළම අධිකරණය ශ්රේෂ්ඨාධිකරණය. ඒ තීන්දුවට අභියෝග කරන්න බැහැ. මම නම් මේ තීන්දුව සමඟ එකඟ නැහැ. දැන් ජනමත විචාරණයක් තිබ්බොත් මහ මැතිවරණයක් ඕන කියලයි රටේ මිනිස්සු කියන්නෙ. තිබ්බ ආණ්ඩුවෙ ගැටලු ජනාධිපතිතුමා කිව්වා. එක පැත්තකින් මහ බැංකුව කොල්ල කෑවා. මහ බැංකු අධිපති කළේ විජාතිකයෙක්. ජනාධිපතිතුමා ඒකට විරුද්ධ වුණා. රණවිරුවන්ට කෙනෙහිළිකම් කළා. අපේ හමුදාව කළේ මානුෂික මෙහෙයුම්. ස්වාමීන් වහන්සේලාට කෙනෙහිළි කළා. ඇත්තු ගැන කථාවෙදිත් අපේ බෞද්ධ සංස්කෘතියට ගැහුවා. මෙතන සංස්කෘතික ගැටුමකුත් තිබුණා.
පාර්ලිමේන්තුවට ජනතා බලය ලැබුණෙ අවුරුදු 5කට. කලින් විසුරුවා හැරීමෙන් ජනතා මතය නොසලකා හැරීමක් සිදුවුණා නේද?
1978 ව්යවස්ථාවෙ තිබුණෙ පාර්ලිමේන්තුවට වසරක් යනකොට ජනාධිපතිට විසුරුවන්න පුළුවන් කියල. රනිල් වික්රමසිංහ මහත්තය 2002දීත් ඕක වෙනස් කරන්න හැදුවා. ඒ වෙලාවෙ ශ්රේෂ්ඨාධිකරණයෙ සත්පුද්ගල විනිසුරු මඬුල්ල කිව්වෙ ඒක විධායකයට අභියෝග කිරීමක් කියල. ජනාධිපති පත්කරන්නෙ රටේම ජනතාව. ජනතා පරමාධිපත්ය තියෙන්නෙ එතනයි. ඒ වෙලාවෙ අධිකරණය කිව්වෙ 2/3 න් සම්මත කරල ජනමත විචාරණයකටත් යන්න කියලයි. එහෙම දෙයක් නොවී තමයි 19න් 4 ½ ක් හදාගත්තෙ. මේක ඉතාම කූඨ විදියට කරපු වැඩක්. කාරක සභාවෙදි තමයි මේ වැඩේ කළේ.
19 වැනි ව්යවස්ථා සංශෝධනයට පාර්ලිමේන්තුවෙ 2/3 ක බලයක් ලැබුණ.
මහින්ද රාජපක්ෂ මහතා ඇතුළු විපක්ෂය එතනදි වරදක් කරන්නෙ. අපි ඒ වෙලාවෙ ඒ අයට මේක සම්මත කරන්න එපා කියල කිව්වා.
විපක්ෂය මේක සම්මත කරන්න උදව් කළේ ඇයි?
විපක්ෂය තමන්ගෙ කාර්යභාරය ඉටුකළේ නැහැ. සරත් වීරසේකර මහත්තය විරුද්ධ වුණා. මහින්ද රාජපක්ෂ මහත්තය කියන නිසා මේකට ඡන්දෙ නොදී ඉන්න බැරි හින්ද ජනක බණ්ඩාර මහත්තය එදා ගෙදර හිටිය. විපක්ෂය කරපු බරපතළ වරදක්. සියතින් ගෙල මිරිකගත්ත වගේ වැඩක්.
එහෙම වගකීමක් නැතුව හැසිරිච්ච කණ්ඩායමකට රටේ ආණ්ඩු බලය ගියොත් මොකද වෙන්නෙ?
අපිට තියෙන්නෙ බල කඳවුරුවලින් නරක අඩුම කඳවුර තෝරගන්න. අපි කැමති සියලු ගුණාංග තියෙන ආණ්ඩු හොයාගන්න බැහැ. ඒ අය මේකෙන් හොඳ පාඩම් ඉගෙන ගත්ත. එහෙම ඉගෙන ගත්තෙ නැත්නම් ඒ අය ආණ්ඩු කරන්න හොඳ නැහැ.
ව්යවස්ථාදායකයයි විධායකයයි අතර පහුගිය කාලෙ ඇතිවුණ ගැටුම සංසිදුනෙ නැත්නම් රටේ අනාගතයට මොකද වෙන්නෙ?
විධායකය, ව්යවස්ථාදායකය, අධිකරණය බොහොම හොඳට තිබුණා. 19 තමයි මේ අර්බුද ඇති කළේ. සමහර වගන්තිවලට අනුව ජනාධිපතිට විසුරුවන්න පුළුවන්. 70 – 1 තමයි බැහැ කියන්නෙ. කොයිතරම් දක්ෂ නීතිඥ මහතුන්ගෙන් වුණත් නඩුවෙදි කරුණු හරියට මතුවුණේ නැහැ. ගැටුම් ඇති වුණොත් රට ඉදිරියට යන්නෙ නැහැ. දැන් ආණ්ඩුවක් පත්වෙලා තියෙනවා. ඒ හින්ද ගැටුමක් වෙන එකක් නැහැ.
ටී. එන්. ඒ. එක ප්රජාතන්ත්රවාදී දේශපාලන ප්රවාහයක්. ඔවුන්ට විරුද්ධව දකුණේ එල්ලවෙන චෝදනා දකින්නෙ කොහොමද?
දකුණේ විවේචන සාධාරණයි. විපක්ෂ නායක හැටියටත් සම්බන්දන් මහතා කතා කළේ දෙමළ ජාතිය ගැන විතරයි. ටී. එන්. ඒ. එකේ කට්ටිය, එල්. ටී. ටී. ඊ. කාලෙ ඔවුන්ට වක්රව උදව් කළා. ඔවුන් එල්. ටී. ටී. ඊ.ය දේශපාලන කණ්ඩායම, බෙදුම්වාදය රකින කට්ටිය. විග්නේශ්වරන් මහත්තය අදත් ප්රසිද්ධියෙ කියන්නෙ උතුරෙන් සිංහල අය යන්න ඕන කියල.
එල්. ටී. ටී. ඊ. සන්නද්ධ අංශ නායකයො පවා පාර්ලිමේන්තු දේශපාලනය කළා. ටී. එන්. ඒ. එක එහෙම කණ්ඩායමක් නෙවෙයි නේද?
ඔව්. කරුණා අම්මාන්, පිල්ලෙයාන් ඒ අය ශ්රී ලංකා නිදහස් පක්ෂයෙ සාමාජිකත්වය ගත්තා. ඔවුන් ප්රජාතන්ත්රවාදී ප්රවාහයට ආවා. ඔවුන් දෙමළ ජාතිවාදී වුණේ නැහැ.
ඇමැති විෂයන් බෙදීමේදී පහුගිය කාලෙ පුරාම කිසිම විද්යාත්මක පදනමක් තිබුණෙ නැහැ. මේ තත්ත්වය ඔබ දකින්නෙ කොහොමද?
අනිවාර්යයෙන්ම මේ විකාරය නවත්වන්න ඕන. ඇමතිවරු නෙවෙයි අමාත්යංශයි අපි පැහැදිලිව හඳුනගන්න ඕන. ඉස්සර පැහැදිලිව ඇමැති විෂය බෙදල තිබුණ. එකිනෙකට සම්බන්ධ විෂයන් එක අමාත්යංශයක් යටතට ගන්න ඕන. එක එක්කෙනා සතුටුකරන්න ඇමතිකම් දීල වැඩක් නැහැ. ආණ්ඩු මාරුවුණාට අමාත්යංශ මාරුවෙන්න බැහැ.
පැනීමේ විද්යාවට ඇමැතිකම් එපා
- ආචාර්ය ජනක් කුමාරසිංහ
ශ්රී ජයවර්ධනපුර විශ්වවිද්යාලය
රනිල් වික්රමසිංහ මහතා නැවත අගමැති වශයෙන් දිවුරුම් දුන්නා. දැන් ආණ්ඩුව ගමන් කළයුතු මාර්ගය ඔබ දකින්නෙ කොහොමද?
පළාත් පාලන මැතිවරණයෙදි ජනතාව ආණ්ඩුවට හොඳ පණිවුඩයක් දුන්නා. ඒක ආණ්ඩුව තේරුම් ගත්තෙ නැහැ. දේශපාලන ව්යාපාරවලට වඩා 2015දි ප්රබලව ක්රියාකාරී වුණේ සිවිල් ව්යාපාර. දූෂණය නැති කරනව, දූෂිතයන්ට දඬුවම් කරනව කියල ජනතාව බලාපොරොත්තු වුණා. මහ බැංකු වංචාව වුණා. පෙර ආණ්ඩුවෙ වැරදි ආයෙත් වෙන්න පටන්ගත්තා. මේ ආණ්ඩුව, යහපාලන ආණ්ඩුවෙ පරමාර්ථ ඉටුකරන්න කටයුතු කරන්න ඕන. එහෙම වුණොත්, මේ ආණ්ඩුවට ජනතා ආකර්ශනය ඇතිවෙයි.
රටේ පැවති දේශපාලන අස්ථාවරත්වය නැතිකරන්න අධිකරණයටත් මැදිහත්වෙන්න වීම ගැන ඔබ මොකද කියන්නෙ?
අධිකරණය, ව්යවස්ථාදායකය, විධායකය කියන්නෙ ව්යවස්ථාවට අනුව ප්රධාන බලකණු තුන. කිසිම කෙනෙක්ට මේ ගැන අවබෝධයක් තිබුණෙ නැහැ. පහුගිය දින 51දී ජනතාව මේ ගැන හොඳ අවබෝධයක් ගත්ත. ඒක හොඳ තත්ත්වයක්. අධිකරණයෙ ස්වාධීනත්වයෙන් ජනතාවට කොච්චර දෙයක් ගන්න පුළුවන්ද කියල මේ සිදුවීමෙන් පේනවා. මේ තත්ත්වයෙදි අධිකරණයවත්, ව්යවස්ථාදායකයවත්, විධායකයවත් ජයගත්තෙ නැහැ. ප්රජාතන්ත්රවාදයෙ බලකණු තුනේ නැගිටීමෙන් රටේ ප්රජාතන්ත්රවාදය, ජනතා පරමාධිපත්ය තමයි ජයගත්තෙ. මේ එකක් හරි අනවශ්ය විදියට මතුවුණානම් ඒකෙ පහර වදින්නෙ ජනතා පරමාධිපත්යයට.
ඔබ ජනතා පරමාධිපත්ය ජයගත්ත කිව්වත් බොහෝදෙනෙක් කියන්නෙ ජනතාවගෙ ඡන්ද අයිතියයි නැතිවුණේ කියල.
ජනතා පරමාධිපත්ය කියන්නෙ ඡන්ද බලය විතරක්ම නෙවෙයි. ජනතාව පත්කරපු ආණ්ඩුවකට කාලසීමාව ඉවරවෙනකන් යන්න දෙන්න ඕන. ව්යවස්ථාව කොලකෑල්ලක් විය යුතු නැහැ. ව්යවස්ථාව හරියට ක්රියාත්මක වීම වැදගත්. 2015 ඡන්දය දීපු මිනිසුන්ගෙ ඡන්ද අයිතිය අවුරුදු 5ක් යනතෙක් කඩන්නත් බැහැ. ඔබේ ඔය තර්කයට අනුවත් තියෙන්නෙ ජනතාවගෙ පරමාධිපත්ය බලය. ඒ පරමාධිපත්ය දූෂණය කරන්න බැහැ. ජනතා පරමාධිපත්ය ඡන්දයකට ලඝුකරන්න එපා.
ව්යවස්ථාදායකයයි, විධායකයයි අතර ගැටුම සංසිදුනෙ නැත්නම් රටට මොකද වෙන්නෙ?
රජයකින් බලාපොරොත්තු වෙන්නෙ ජනතා සුබසාධනය. ඒ ගොල්ලො අමතක කරන්නෙත් මේක තමයි. ජනතාවගෙ ජීවන තත්ත්වය ඉහළ දාන්න ව්යවස්ථාදායකය, විධායකය, අධිකරණය එකතු වෙන්න ඕන. මේව හැප්පෙන්න ගත්තොත් ජනතාවගෙ අපේක්ෂා ඉටුවෙන්නෙ නැහැ. නීතිය ශක්තිමත් වෙන්න ඕන. එතන ඉඳන් තීන්දු තීරණ ගන්න ඕන. බල අරගලය පැත්තකට දාන්න ඕන. පහුගිය දින 51දී රට ආපස්සට ගියා. රටට ආපු ආයෝජන නැතුවුණා. අපි ආර්ථික පරිහානියට ගියා. ලෝකයා අපි ගැන අවිශ්වාස කළා. ඒ නිසා රටට එන්න තිබිච්ච ආයෝජන වෙන රටවලට ගියා. මේ සිද්ධිය නිර්මාණය කරපු හැමෝම රටට වෙච්ච පාඩුවට වගකියන්න ඕන. ආර්ථික අලාභය හිතාගන්නවත් බැහැ.
අලුත් ආණ්ඩුක්රම ව්යවස්ථාව, යහපාලන සමාජ ප්රතිසංස්කරණ මේ පවතින තත්ත්වය තුළ යථාර්ථයක් බවට පත්කරගන්නෙ කොහොමද?
රට ගොඩනගන්න තිබුණු ස්වර්ණමය අවස්ථාව තිබුණෙ 2009 යුද්ධයෙන් පස්සෙ. අපි ඒ අවස්ථාව මඟහැරියා. සියලු ජාතීන් එකතුකරගෙන සියලු ජාතීන්වම හදාගෙන අපිට හොඳ ගමනක් යන්න තිබුණා. යුද්ධයෙන් පස්සෙ රටේ ඇතිවෙච්ච තත්ත්වය ඉතාම නරකයි. 2015 රටේ ජනතාව පාලකයන් වෙනස් කළේ ඒකයි. ව්යවස්ථාදායකය ශක්තිමත් කිරීම, විධායකය අහෝසි කිරීම රටේ නීති පද්ධතිය ශක්තිමත් කිරීම යහපාලනයෙන් බලාපොරොත්තු වුණා. සමහර කාරණා ඉටුකරන්න පුළුවන් වුණත් ජනතාව හිතපු තරම් දෙයක් වුණේ නැහැ. දැන් තියෙන පාර්ලිමේන්තු බලයෙන් මේව කොච්චර කරන්න පුළුවන්ද කියන ප්රශ්නය තියෙනවා. රට ගැන හිතල පාර්ලිමේන්තු ගිය අය අඩුයි. තමන්ට ඇමැතිකම නැතිවෙච්ච ගමන් එහා පැත්තට පනිනවා. නව රජය හරියට වැඩ කළොත් සමහර කාරණා දිනාගන්න පුළුවන්.
ටී. එන්. ඒ. එක ගැන දකුණේ බොහෝ දෙනෙක් විවිධ විවේචන කරනවා. මේ ගැන ඔබ මොකද කියන්නෙ?
මම පුද්ගලිකව යුද විරෝධියෙක්. ජාතිවාදියෙක් නෙවෙයි. මොන පක්ෂයක හිටියත් පාර්ලිමේන්තුවට ගිය අය ජනතා පරමාර්ථ ඉටු කරනවද කියන එක විතරයි මට වැදගත්. ටී. එන්. ඒ. මන්ත්රීවරුත් මේ රටේ පුරවැසියො. ඔවුන් නියෝජනය කරන්නෙ ජනතා කැමැත්තක්. මේ රට ජාතීන් හැටියට බෙදන්න හදන්නෙ ඉහළ ඉන්න දේශපාලකයන්. ජාතිය අනුව පාර්ලිමේන්තුවෙ ආසන වෙන් කරල නැහැ. උතුරේත් දකුණෙත් අපි හැමෝටම තියෙන ප්රශ්න එකයි. උතුරෙ නායකයොත් දකුණෙ නායකයොත් එක්ව රට හදන්න ඕන. හොඳම උදාහරණය ප්රංශය. කහ කබාකාරයන්ගෙ සටනෙ හැම ජාතියක්ම හිටිය. ඔවුන් හැමෝටම තිබුණෙ පොදු ප්රශ්නයක්. ටී. එන්. ඒ. එක වෙන තැනකට තල්ලුකරන්න හදන්නෙ ඇයි. හැමෝම එකතුකරගන්නයි ඕන.
ඇමැති විෂයන් බෙදද්දි කිසිම දවසක විද්යානුකූල පදනමක් තිබුණෙ නැහැ...
ඒක හරියටම හරි. මම ඔබත් එක්ක සියයට සියයක්ම එකඟයි.
මේ අමාත්යංශ විෂය බෙදීම නිවැරදි කරගන්න ඔබ මොනවගේ වැඩ පිළිවෙළක්ද යෝජනා කරන්නෙ.
රටේ උගත් බුද්ධිමත් කට්ටිය එකතුවෙලා ලොකු හැදෑරීමක් කරල වැඩ පිළිවෙළක් හැදුවා. ඒක යහපාලන ආණ්ඩුවට බාර දුන්නා. දැන් අමාත්යාංශ බෙදන විදියෙ කිසිම පදනමක් නැහැ. විෂයන් අතර සම්බන්ධීකරණයක් නැහැ. මේ ආණ්ඩුව අපි දීපු වාර්තාව බලන්න ඕන. අඩුම තරමෙ අමාත්යංශ විෂය බෙදීමෙදිවත් විද්යාත්මක පදනමක් තියෙන්න ඕන. ඇමතිකම් දීමෙදි තියෙන විද්යාව තමයි පැනීමේ විද්යාව, පනිනවනම් ඇමැතිකමක් දෙනවා. අමාත්යංශ කැඩුණොත් සැලසුම් සකස්කරගන්න බැහැ. එක ප්රතිපත්තියක් හදන්න පුළුවන් විදියටවත් අමාත්යංශ බෙදන්න ඕන.
නව අදහස දක්වන්න