ඉඩම් හිමි සුළුතර සුදු ජාතික ධනවතුන්ගෙන් එම ඉඩම් යළි අත්පත් කරගැනීමේදී වන්දි ගෙවීමක් සිදුවන්නේ නැත. ඔවුන් බලහත්කාරයෙන් අත්කරගෙන සිටියේ තම භූමිය බැවින් එය නිදහස් කරගැනීමේදී ඔවුන්ට වන්දි ගෙවීම අනවශ්ය බව රජයේ අදහසය.
දකුණු අප්රිකාවේ වර්ණභේදවාදය තුරන්කොට විසිපස් වසරකට ආසන්න කාලයක් ගත වී ඇතත් එරට ඉඩම් වැඩි කොටසක් තවමත් ඇත්තේ සුළුතර සුදු ජාතිකයන් අතය. ඉඩම් හිමියන් වන ඔවුහු ගොවිබිම්වල වැඩිම අයිතිය දරති. මෙම ඉඩම් යළි අත්පත් කර ගැනීම වෙනුවෙන් වරින්වර නොයෙක් ප්රයත්න දියත් කෙරිණි. සුදු ජාතිකයන් හා ස්වදේශික අප්රිකානුවන් අතර ගැටුම් ඇතිවීමට පවා මේ කාරණය ප්රබල හේතුවක් වී තිබේ. ජනාධිපති සිරිල් රම්පොසාගේ රජය එම ඉඩම් අත්පත්කර ගැනීමේදී මර්දනකාරී පිළිවෙතක පිහිටා සිටින බව බටහිර රටවල චෝදනාවය. දකුණු අප්රිකා රජය එකී චෝදනා ප්රතික්ෂේප කරමින් කියා සිටින්නේ තම භූමියේ අයිතිය ස්වදේශිකයන් සතුවිය යුතු බවය. ඒ වෙනුවෙන් ඉඩම් ප්රතිසංස්කරණ වැඩපිළිවෙළක් එරට රජය මඟින් දියත් කර ඇත.
සුළුතර සුදු ජාතිකයන් සහ ස්වදේශික අප්රිකානුවන් අතර ඇති ගැටුම දිග්ගැස්සෙමින් තිබියදී දෙපාර්ශ්වයෙන්ම කෙරෙන ප්රකාශ ඇවිලෙන ගින්නට පිදුරු දැමීමක් බව පසුගිය කාලය පුරාම තහවුරු විය. කල්ලන් පළමුව, භූමිය පළමුව (Black First, Land First - BLF) නම් දේශපාලන පක්ෂයේ නායකයා වන අන්දිල් වන්ග්ෂිටමා මීට දෙදිනකට ඉහත දී කළ බව පැවසෙන ප්රකාශයන් යළිත් දෙබරයට ගල්ගැසීමක් වී තිබේ.
ආණ්ඩුක්රම සංශෝධන
‘මේ ඉඩම් භූමිය අයිති අපටයි. දැන් එය කෙසේ හෝ අත්කර ගැනීමට අප තීරණය කර තිබෙනවා’යනුවෙන් රැලියකදී පවසා ඇති ඔහු තවත් එක් කළු ජාතික රියැදුරකු හෝ මරා දැමුවහොත් සුදු ජාතිකයන්ට ද එම ඉරණමම අත්විය හැකි බවට අනතුරු අඟවා තිබිණි. එය එකට පහ අනුපාතයෙන් විය හැකි බවට ඔහු පැවසුවේ යැයි මාධ්ය වාර්තා කර ඇත. හමුවන ඕනෑම අයකුට එවැනි ඉරණමක් අත්විය හැකි බව ඔහු ප්රකාශ කර ඇත්තේ කාන්තාවන් හා ළමුන් ගැන ද අනතුරු අඟවමිනි.
පාලක අප්රිකානු ජාතික කොන්ග්රසයේ (ANC) ප්රකාශක ෂිෂී කොඩ්වා එම ආන්දෝලනාත්මක ප්රකාශය ප්රතික්ෂේප කර ඇත. වර්ගවාදී පිළිවෙතක පිහිටමින් ක්රියාකිරීම අනුමත කළ නොහැකි බව ද එහි දැක්විණි. කෙසේ වුවද තමා කළ ප්රකාශය වෙනුවෙන් පෙනී සිටින බව මැන්ෂිටමා කියා සිටී. ඔහු පවසන්නේ, තමා ප්රතිචාර දැක්වූයේ කෝටිපති සුදු ජාතික ජෝන් රපට්ගේ ප්රකාශයකට බවය. දකුණු අප්රිකාවේ ටැක්සි කර්මාන්තයේ නියැළෙන ස්වදේශිකයන් ඉලක්ක කරමින් රපට් මීට පෙර කළ ප්රකාශයකින් ඔවුන්ට අනතුරු අඟවා තිබුණේ, ඔහු සතුව “තමාගේ හමුදාවක්’ ඇතැයි කියමිනි.
යළිත් වරක් ජනයා අතර නොසන්සුන්තාවක් ඇති වී ඇත්තේ, සිය ඉඩම් වන්දි ගෙවීමකින් තොරව අත්පත්කර ගැනීමට ක්රියාකිරීම නීති විරෝධී යැයි ප්රකාශ කරන මෙන් හා එය වළක්වන ලෙස ඉල්ලා අධිකරණයට ඉදිරිපත් කළ පෙත්සමක් ප්රතික්ෂේප වීමත් සමඟය. ආණ්ඩුක්රම ව්යවස්ථාවේ 25 වෙනි පරිච්ඡේදයට කරන ලද සංශෝධන මඟින් සුදු ජාතික ඉඩම් හිමියන් අත්පත් කරගෙන ඇති ඉඩම් යළි ස්වදේශිකයන්ට භාරදිය යුතු බවට යෝජනා කෙරිණි. එම සංශෝධන ලබන අප්රේල් මස සිට ක්රියාත්මක වීමට නියමිතය.
ආණ්ඩුක්රම සංශෝධනයට පක්ෂව ඡන්ද 183 ක් ලැබුණු අතර විපක්ෂව ඡන්ද 77 ක් ලැබිණි. එම සංශෝධන සම්මත වීමත් සමඟ ඉඩම් අත්පත් කරගැනීමේ ක්රියාවලියට නීත්යානුකූල බවක් ලැබී ඇති බව ද එම ප්රතිපාදන එරට නීතියක් බවට පත්ව ඇති බව ද රජය කියා සිටී. එම කමිටුවේ සම සභාපති ලෙවිස් ෂිමැන්ඩේ කියා තිබුණේ, දකුණු අප්රිකානුවන් හඬනඟා පැහැදිලිව කතා කර ඇති බවය. “අප ඔවුන්ගේ හඬට සවන්දිය යුතුයි” යනුවෙන් ඔහු පවසා තිබිණි.
නව නීතියට එරෙහිව අදහස් දක්වන අය කියා සිටින්නේ එය ක්රියාවට නැංවීමත් සමඟ දෙපාර්ශ්වය අතර දරුණු ගැටුම් ඇතිවිය හැකි බවය. ඉකුත් දශක දෙක තිස්සේ ක්රියාත්මක කිරීමට වෑයම් කළ ඉඩම් ප්රතිසංස්කරණවලට නීත්යානුකූල බවක් ලැබීම ගැන අදහස් දක්වන විපක්ෂ කණ්ඩායම්වල මතය වී ඇත්තේ තමන් ඉඩම් ප්රතිසංස්කරණවලට එරෙහි නොවන නමුත් නව ව්යවස්ථා සංශෝධනයට එරෙහි බවය.
ට්රම්ප් ගේ පණිවුඩය
ඉඩම් හිමි සුළුතර සුදු ජාතික ධනවතුන්ගෙන් එම ඉඩම් යළි අත්පත් කරගැනීමේදී වන්දි ගෙවීමක් සිදුවන්නේ නැත. ඔවුන් බලහත්කාරයෙන් අත්කරගෙන සිටියේ තම භූමිය බැවින් එය නිදහස් කරගැනීමේදී ඔවුන්ට වන්දි ගෙවීම අනවශ්ය බව රජයේ අදහසය.
මාස තුනකට ඉහතදී මෙම ඉඩම් අත්කර ගැනීම් පිළිබඳ අමෙරිකා ජනාධිපති ඩොනල්ඩ් ට්රම්ප් තැබූ ට්විටර් පණිවිඩයත් ආන්දෝලනයක් ඇතිකළේය. ඉන් කියැවුණේ එම ඉඩම් අත්කර ගැනීමේ ක්රියාවලිය හා මහා පරිමාණව සිදුවන ගොවීන් මරාදැමීම ගැන සමීපව අධ්යයනය කරන ලෙස තමා රාජ්ය ලේකම්වරයාට උපදෙස් දුන් බවය.
අමෙරිකා ජනාධිපතිවරයාගේ එම පණිවිඩය මුළුමනින්ම ප්රතික්ෂේප කළ දකුණු අප්රිකා රජය ද ට්විටර් පණිවිඩයක් නිකුත් කරමින් කියා සිටියේ, එම පටු අදහස් දැක්වීම මඟින් සිදුකරන්නේ සිය ජාතිය බෙදා වෙන්කිරීම හා තම යටත්විජිත අතීතය යළි සිහිපත් කිරීම බවය. එමෙන්ම එම ප්රකාශය වැරැදි කරුණු මත පදනම්ව සිදුකළ එකක් බව ද දකුණු අප්රිකා රජය පවසා තිබිණි.
හිටපු ඕස්ට්රේලියා අගමැති ටෝනි ඇබට් මීට පෙර කළ ප්රකාශයකින් දැක්වුණේ ඉඩම් හිමි සුදු ජාතිකයන් 400 ක් පමණ ඉකුත් වසරේ මරා දමා ඇති බවය. එහෙත් ගොවීන් වෙනුවෙන් පෙනී සිටින සංවිධානයක් වන ට්රාන්ස්වාල් කෘෂිකර්ම සංගමය පවසා ඇත්තේ 2017 වසරේදී ගොවීන් 84 දෙනකු මරා දමා ඇති බව ය. ඉන් 59 දෙනකු සුදු ජාතිකයන් බව ද එහි දැක්විණි. මේ වසරේ මුල් මාස 3 තුළද ගොවීන් 15 දෙනකු මරා දමා ඇතැයි වාර්තා විය. ඉන් 8දෙනකු සුදු ජාතිකයන්ය.
ඉඩම් අත්පත් කර ගැනීම දකුණු අප්රිකාවේ ආර්ථිකයට හා ආහාර සුරක්ෂිතතාවට බලපෑ හැකි බවට මත පළව ඇතත් ජනාධිපති රම්පොසා කියා සිටින්නේ එවැනි කාරණා පිළිබඳ තැකීමක් නොකර නව නීති ක්රියාත්මක කරන බවය. අතිශයෝක්තියෙන් දක්වා නැති සංඛ්යාලේඛන මඟින් පැහැදිලි වන්නේ සුදු ජාතික ඉඩම් හිමියන් පමණක් නොව ස්වදේශික අප්රිකානුවන් ද මේ ඉඩම් ප්රශ්නය හේතුවෙන් ජීවිතවලින් වන්දි ගෙවන බවය.
දකුණු අප්රිකාව වර්ණභේදවාදය පරාජයට පත්කර ලබන වසරට 25 වසරකි. අප්රිකානුවන්ගේ බසින් ‘ඇපාතයිඩ්’යනු “බෙදුම්වාදයයි.’ දකුණු අප්රිකාවේ 1948 - 1994 වකවානුවේ ක්රියාත්මකව පැවැතියේ ඇපානයිඩ් හෙවත් වර්ණභේදවාදී පාලනයකි. සුදු ජාතික පාලකයන් ස්වදේශික කළුජනයා මත අතිශයින් මර්දනකාරී පාලනයක් පටවා තිබිණි. කළු මිනිසාට වඩා සුදු මිනිසා උසස් බව සැලකිණි.
අළුයට ගින්දර
වර්ණභේදවාදයට එරෙහිව නෙල්සන් මැන්ඩෙලා ඇතුළු නායකයන් ජීවිත පරිත්යාගයෙන් යුතුව ගෙන ගිය අරගලය අවසානයේ ජයග්රහණය කළේය. සුදු ජනාධිපති එෆ්. ඩබ්. ඩී. ක්ලාර්ක්ගෙන් නෙල්සන් මැන්ඩෙලා අතට බලය මාරු විය. මැන්ඩෙලාගේ පාලනය යටතේ සමාව දීමේ පිළිවෙතක් අනුගමනය කෙරිණි. ඉන්පසුව සුළුතර සුදු ජාතිකයන් සම්බන්ධයෙන් දැඩි පිළිවෙතක පිහිටා සිටින බවට බටහිර රටවලින් දකුණු අප්රිකාවට එරෙහිව චෝදනා එල්ල විය. ජනාධිපති රම්පොසාගේ රජයට එරෙහිව ද ඒවා නැඟෙමින් තිබේ.
වර්ණභේදවාදය අවසන් කිරීමෙන් පසු ගෙවී ගිය දශක දෙකහමාරක කාලසීමාවේදී මැන්ඩෙලාගේ පාලනය යටතේ සංහිඳියා ක්රියාවලියක් ද දියත් විය. එසේ වුවද අළු යට සැඟව තිබූ ගිනි පුපුරු යළි දිලිසෙන්නට පටන් ගන්නා බවක් ගතවූ කාලයේදී වරින්වර දිස්විය.
වර්ණභේදවාදී පාලනය යටතේ තමන් ශිෂ්ට යැයි කියා සිටි සුදු පාලකයන් ස්වදේශික කළු ජාතිකයන් සම්බන්ධයෙන් අනුගමනය කළ පිළිවෙත මනුෂ්යත්වයට නිගා දෙන්නක් බවට ඉතිහාසය සාක්ෂි දරයි.
කවර ජනකොට්ඨාසයක් වුවද මර්දනකාරී ලෙස තලා පෙළා දැමීම මනුෂ්යත්වයේ නාමයෙන් අනුමත කළ නොහැකිය. ඒ සමඟම සිහි තබාගත යුතු කාරණයක් වන්නේ කිසිවකුට හෝ නෙළා ගැනීමට සිදුවන්නේ තමන් වපුරන ලද බීජවල අස්වැන්න බවයි.
නව අදහස දක්වන්න