ආසියානු ක්රිකට් කවුන්සිලය සංවිධාන කරන ආසියානු කුසලාන නැඟී එන එක්දින ක්රිකට් තරගාවලියේ අවසන් මහා තරග අද (15) සත්කාරක ශ්රී ලංකාව සහ ඉන්දියාව අතර ආර්.ප්රේමදාස ක්රීඩාංගණයේදී පැවැත්වේ.
ඉන්දියාව අපරාජිතව අවසන් තරගයට එක්වූ අතර ශ්රී ලංකා පිල මූලික වටයේදී ඉන්දියාවට පමණක් පරාජය විය. පළමු අවසන් පූර්ව තරගයේදී පාකිස්තානය කඩුලු 7කින් පරාජය කරමින් අවසන් තරගයට පිවිසි ඉන්දියාව මූලික වටයේදී ඇෆ්ගනිස්තානය ලකුණු 74කින්, ඕමානය කඩුලු 6කින් පරාජයට පත් කළේය.
දෙවැනි අවසන් පූර්ව තරගයෙන් බංග්ලාදේශය කඩුලු 4කින් පරාජය කරමින් අවසන් තරගයේ සිය ස්ථානය වෙන්කරගත් සත්කාරක ශ්රී ලංකා පිල මූලික වටයේදී ඕමානය ලකුණු 109කින්ද, ඇෆ්ගනිස්තානය කඩුල්ලකින්ද පරාජයට පත් කළේය.
මේ කණ්ඩායම් දෙකම මින් පෙර නැඟී එන ශූරතාව බැගින් දිනා සිටී. ශ්රී ලංකා කණ්ඩායම වත්මන් ශූරයන් ලෙස අවසන් තරගයට එක්වන අතර ඉන්දියාව පළමු වරට පැවැති 2013 තරගාවලියේ ශූරතාව දිනා ගත්තේය. නැඟී එන ආසියානු කුසලාන තරග බිමේ ශ්රී ලංකාව සහ ඉන්දියාව එකිනෙකා හමුවන්නේ තෙවැනි වරටය. මෙවර තරගාවලියේ මූලික වටයේදී මේ දෙපිල අතර පැවැති තරගයෙන් ඉන්දියාවට කඩුලු 6ක ජයක් අත්විය. පසුගිය වසරේ පැවැති දෙවැනි තරගාවලියේදී ශ්රී ලංකාව සහ ඉන්දියාව එක්වරක් හමුවූ අතර එම තරගයෙන් ඉන්දියාව ලකුණු 35කින් ජය ගත්තේය. කෙසේ වෙතත් එම තරගාවලියේදී ඉන්දියාවට අවසන් පූර්ව වටයට හෝ පිවිසීමට නොහැකි විය.
එබැවින් අද තරගයේදී ශ්රී ලංකා ක්රීඩකයන්ට ඉන්දියාව හමුවේ පරාජයන්ට තිත තැබීමට පෙර තරගවලට වඩා වැඩි යමක් කිරීමට සිදුවෙයි.
මුලික වටයේ තරගයේදී අවිශ්ක ප්රනාන්දු (80) සහ අසේල ගුණරත්න (67) පිත්තෙන්ද, කමිඳු මෙන්ඩිස් පන්දුවෙන්ද ශ්රී ලංකාව වෙනුවෙන් දස්කම් දැක්වූ අතර මෙවර තරගාවලියේ වැඩිම ලකුණු ලාභියා වන හිම්මත් සිං ශ්රී ලංකාවට එරෙහිව ශතකයක් (126) රැස් කළේය.
තුන් ඉරියව් ක්රීඩක කමිඳු මෙන්ඩිස් ශ්රී ලංකා පිලේ ප්රධාන තුරුම්පුව වන අතර හිම්මත් සිං ඉන්දීය පිලේ තරග දිනවන්නා වෙයි. තරග 4කදී ශතකයක් සහ අර්ධ ශතක අර්ධ ශතක 2ක් සමගින් හිම්මත් සිං රැස්කර ඇති ලකුණු සංඛ්යාව 270කි.
කමිඳු මෙවර තරගාවලියේ ලකුණු ලාභීන් අතරින් හිම්මත්ට පමණක් දෙවැනි වන අතර පන්දු යවන්නන් අතරේ තෙවැනි ස්ථානයේ පසුවෙයි. තරග 4කදී අර්ධ ශතක 3ක් සමගින් ලකුණු 249ක් රැස්කර ඇති ඔහු කඩුලු 8ක් දවා ගැනීමට සමත්ව සිටී.
පන්දු යවන්නන් අතරේ ඉදිරියෙන් පසුවන ඉන්දීය පිලේ මායාන්ක් මාර්කන්ඩි තරග 3කදී කඩුලු 11ක් දවාගෙන ඇති අතර ඉන්දීය නායක ජයන්ට් යාදව් තරග 4කදී බිඳ හෙළා ඇති කඩුලු සංඛ්යාව 9කි.
නව අදහස දක්වන්න