සංචාරක ශ්‍රී ලංකාව හා නවසීලන්තය අතර පළමු ටෙස්ට් ක්‍රිකට් තරගය වෙලින්ටන්හී බේසින් රිසර්ව් ක්‍රීඩාංගණයේදී ශ්‍රී ලංකා වේලාවෙන් අද අලුයම 3.30ට ආරම්භ වෙයි. තරග දෙකකින් සමන්විත මේ තරගාවලියේදී නවසීලන්තය තරග දෙකම ජය ගතහොත් ලොව ටෙස්ට් වර්ගීකරණයේ සිවුවැනි ස්ථානයේ සිට දෙවැනි ස්ථානය දක්වා ඉහළ නැගීමට සමත්වනු ඇත. ශ්‍රී ලංකාව ශ්‍රේණිගත කිරීමේ හයවැනි ස්ථානයේ පසු වුවද, ඕනෑම වේලාවක නැගී සිටිය හැකි කණ්ඩායමක් ලෙස සැලකෙන හෙයින් මේ පළමු ටෙස්ට් තරගය දෙස බොහෝ දෙනකුගේ අවධානය යොමුව පවතී.
ශ්‍රී ලංකා ටෙස්ට් පිලේ මෙතෙක් තිබූ සියලු දුරුවලතා මඟ හරවා ගෙන මේ තරගයට මුහුණදීමට අපේක්ෂාවෙන් පසුවන අතර පසුගිය මාසයේදී එංගලන්තයට එරෙහිව තරග 3-0ක දැවැන්ත පරාජය සහමුලින්ම අමතක කිරීමට වගබලා ගත යුතු වේ. නවසීලන්තය මෙයට සතියකට පමණ පෙර එක්සත් අරාබි එමීර් රාජ්‍යයේ නිමාවූ පාකිස්තානයට එරෙහි තරගාවලිය 2-1ක් ලෙස ජයගෙන ඉහළ මානසිකත්වයකින් පසුවීම ඔවුන්ට ඇති අමතර ශක්තියකි.
ශ්‍රී ලංකා පිලේ පුහුණුකාර්ය මණ්ඩලය වෙනස් කිරීමෙන් යම් නැවුම් බවක් අපේක්ෂා කළ හැකි අතර පිතිකරු පුහුණුකරු ලෙස එංගලන්තයේ ජොනතන් ලුවිස් හා පන්දු රැකීමේ පුහුණුකරු ලෙස ඔස්ට්‍රේලියාවේ ස්ටීව් රික්සන් යන මහත්වරු කණ්ඩායමට එක්ව ඇත. පන්දු යැවීමේ පුහුණුකරු ලෙස කටයුතු කළ නුවන් සොයිසා මහතාට පසුගියදා ජාත්‍යන්තර ක්‍රිකට් කවුන්සිලය විසින් තහනමක් පැනවූ හෙයින් ශ්‍රී ලංකා ක්‍රිකට් පිලට ඔහුගේ සේවය අහිමිවී තිබේ. දඟ පන්දු යවන ක්‍රීඩක අකිල ධනංජයට ජාත්‍යන්තර තරග තහනමක් පැනවී ඇති හෙයින් ඔහු ද මේ සංචාරයට සහභාගී නොවේ.
වසර 20014දී ක්‍රයිස්චර්ච් පිටියේදී නවසීලන්තයට එරෙහිව ලකුණු 152ක් රැස්කළ ආරම්භක පිතිකරු දිමුත් කරුණාරත්න වෙලිංටන් ඩොමිනියන් පෝස්ට් පුවත්පතට පවසා ඇත්තේ මේ ටෙස්ට් තරගාවලිය හා ඉදිරි ටෙස්ට් තරගාවලි කළමනාකරණය කර ගැනීමට කණ්ඩායම වෙහෙසවී කටයුතු කරන බවයි. “අපගේ උත්සහාය කණ්ඩායමක් ලෙස ඉදිරියට යෑමයි. අපගේ අරමුණ මේ තරගාවලිය ජය ගැනීමයි. ඒ සඳහා අප සැලසුමක් ඇතිව ක්‍රීඩා කළ යුතුයි. ඒ සඳහා ශක්තිය අපට තිබෙනවා” දිමුත් කරුණාරත්න පැවැසීය.
ශ්‍රී ලංකාව හා නවසීලන්තය අතර පැවැති අවසන් ටෙස්ට් තරග 5කදීම නවසීලන්තය ජය ලබා ඇත. එයින් එක් තරගයක් කොළඹදී පැවැති අතර අනෙක් තරග හතරේදීම නවසීලන්තය ජය ලැබූවේ ඔවුන්ගේම ක්‍රීඩාංගණවලදීය. ශ්‍රී ලංකාව ඇතුළු ආසියානු ටෙස්ට් රටවල් පසුගිය වසර අටක් තුළ නවසීලන්තයේදී ටෙස්ට් තරග 11කට සහභාගීවී ඇති අතර එයින් තරග 9කම ජය නවසීලන්තය සතුකරගෙන ඇත. අනෙක් තරග දෙක ජය පරාජයෙන් තොරව නිමා වූයේ නවසීලන්ත වේග පන්දු යවන්නන්ගේ විශාල අභියෝග මැදය.
නවසීලන්ත පිලේ වේගපන්දු යවන්නන් ත්‍රිත්වය වන ටිම් සවුති, ට්‍රෙන්ට් බෝල්ට් සහ නීල් වැග්නර් අද තරගයේදී ක්‍රීඩා කිරීමට නියමිතව ඇත්තේ දිගු කාලයකට පසුවය. එක්සත් අරාබි එමීර් රාජ්‍යයේදී පසුගියදා නිමාව දුටු පාකිස්තානය සමග ටෙස්ට් තරගමාලාවේදී නවසීලන්ත පිල වැඩි අවධානය යොමු කර තිබුණේ දඟපන්දු යවන්නන් කෙරෙහි වුවද කොළ පැහැති තණකොළ පිරුණු බේසින් රිසර්ව් තණතීරුවේදී මේ වේගපන්දු යවන්නන් තිදෙනා නැවත සුපුරුදු දස්කම් දැක්වීමට බලාපොරොත්තුවෙන් පසුවේ.
නවසීලන්ත පිතිකරු කේන් විලියම්සන් සෑම අවස්ථාවකදීම ශ්‍රී ලංකාවට එරෙහිව පිත්තෙන් දස්කම් දැක්වූ කසකරුවෙකු බවට පත්ව ඇති අතර ශ්‍රී ලංකාවට එරෙහි ඔහුගේ ලකුණු සාමාන්‍ය 91. 88ක්වීමෙන් එය මනාව ඔප්පු වේ. විලියම්සන් ටෙස්ට් තරග 68කදී ශතක 19ක් රැස්කොට ඇති අතර මේ සංචාරයේදී තවත් එක් සියයක් ලැබුවහොත් ටෙස්ට් ශතක 20ක් වාර්තා කළ පළමු නවසීලන්ත පිතිකරු බවට පත්වේ.
ශ්‍රී ලංකා පිලේ පළපුරුදු වේග පන්දු යවන්නාවන සුරංග ලක්මාල් සමග කසුන් රජිත, ළහිරු කුමාර හා දුෂ්මන්ත චමීර යන තුන්කට්ටුවද වේග පන්දුවට හිතකර නවසීලන්ත තණතිල්ලේ දක්වන දස්කම් ශ්‍රී ලංකා පිලට වැඩි වාසියක් ගෙනදීමට සමත්වනු ඇත.
නවසීලන්ත සංචාරයේ පළමු පුහුණු තරගයේදී නොදැවී ලකුණු 128ක් රැස්කළ ඇන්ජලෝ මැතිව්ස් තම අතුදැකීම් තුළින් නවසීලන්ත පන්දු යවන්නන් පාලනය කර ගැනීමට හැකි පිතිකරුවෙකු බැවින් ශ්‍රී ලංකා මැද පෙළ ශක්තිමත් වේ. ආරම්භක පිතිකරු ධනුෂ්ක ගුණතිලක එම තරගයේදී අර්ධ ශතකයක් වාර්තා කරමින් තම ස්ථානය රැක ගත්තේය. නායක දිනේෂ් චන්දිමාල්ට මේ තරගයේදී පිතිකරුවෙකු ලෙස විශාල වගකීමක් දැරීමට සිදුව තිබේ.
ශ්‍රී ලංකා ටෙස්ට් සංචිතය - දිනේෂ් චන්දිමාල් (නායක), දිමුත් කරුණාරත්න (උප නායක), ඇන්ජෙලෝ මැතිව්ස්, කුසල් මෙන්ඩිස්, ධනංජය ද සිල්වා, රොෂේන් සිල්වා, නිරෝෂන් දික්වැල්ල, ධනුෂ්ක ගුණතිලක, ළහිරු තිරිමාන්න, සදීර සමරවික්‍රම, ඩිල්රුවන් පෙරේරා, ලක්ෂාන් සඳකැන්, සුරංග ලක්මාල්, නුවන් ප්‍රදීප්, කසුන් රාජිත, ළහිරු කුමාර, දුෂ්මන්ත චමීර
නවසීලන්ත ටෙස්ට් සංචිතය - කේන් විලියම්සන් (නායක), ටොම් ලේතම්, ජීට් රේවල්, රොස් ටේලර්, හෙන්රි නිකොල්ස්, කොලින් ඩි ග්‍රෑන්ඩෝම්, බී.ජේ.වොල්ටින්, විල් යංග්, ටිම් සවුති, මැට් හෙන්රි, අජාස් පටේල්, ට්‍රෙන්ට් බෝල්ට්, නීල් වැග්නර්.
නව අදහස දක්වන්න