පොදු රාජ්‍ය මණ්ඩලයීය යොවුන් ක්‍රීඩා උළෙලේ බොක්සිං තරග ඉසව්ව නියෝජනය කරන ශ්‍රී ලංකා ක්‍රීඩක ක්‍රීඩිකාවන් තෝරාගැනීම සඳහා පැවැති තරගාවලියේ දී බාලිකා තරග ඉසව්ව ජයගත් පල්ලේබෝවල මහා විද්‍යාලයේ ක්‍රීඩිකාව නොසළකා හරිමින් බාලක තරග අංශය ජයගත් ක්‍රීඩකයක් දෙදෙනකු පමණක් පොදු රාජ්‍ය මණ්ඩලයීය යොවුන් ක්‍රීඩා උළෙලට යැවීමට ශ්‍රී ලංකා බොක්සිං සංගමය කටයුතු සූදානම් කරමින් සිටින බව විශ්වාස කටයුතු ආරංචි මාර්ග සඳහන් කරයි.
කොළඹ රාජකීය විදුහල් බොක්සිං වළල්ලේ පසුගියදා පැවැති මේ තෝරාගැනීමේ තරගාවලියට කිලෝග්‍රෑම් 49, 52 සහ 56 බරපන්ති යටතේ බාලක තරග පවත්වා ඉන් දක්ෂතම ක්‍රීඩකයා ද, කිලෝග්‍රෑම් 48-51 බර පන්තිය යටතේ බාලිකා තරගය පවත්වා ඉන් දක්ෂතම ක්‍රීඩිකාව ද තෝරාගැනීමට නියමිතව තිබූ බව වාර්තා වෙයි.
ඒ අනුව කිලෝග්‍රෑම් 49 බර පන්තියෙන් තරග වැදුණු බාලක තරග අංශයෙන් පිලිමතලාව ධීරානන්ද විදුහලේ සංජය බණ්ඩාර සමස්ත තරගාවලියේ දක්ෂතම ක්‍රීඩකයා බවට පත්වූ අතර බාලිකා තරග ඉසව්වේ දක්ෂතම ක්‍රීඩිකාව ලෙස පල්ලේබෝවල මහා විද්‍යාලයේ එරංගා ප්‍රියදර්ශනී පත්වූවාය. එසේවුවත් බාලක කිලෝග්‍රෑම් 52 සහ 56 බරපන්තිවලින් කොළඹ රාජකීය විදුහලේ ක්‍රීඩකයන් දෙදෙනකු ජයගෙන සිටි බැවින් එහිදී ඇතිවූ විරෝධයක් මත බාලිකා තරග ඉසව්ව ජයගත් ක්‍රීඩිකාව දක්ෂතම ක්‍රීඩිකාව ලෙස නම් නොකොට තරගාවලියේ දක්ෂතම ක්‍රීඩක ක්‍රීඩිකාවන් ලෙස ඔවුන් සිවුදෙනාම නම් කිරීමට තේරීම් භාරව සිටි නිලධාරීන් කටයුතු කොට ඇතැයි ආරංචි මාර්ග සඳහන් කරයි.
එලෙස ලැයිස්තුගත කළ ක්‍රීඩක ක්‍රීඩිකාවන් අතර පළමු ස්ථානය පිළිමතලාව ධීරානන්ද විදුහලේ ක්‍රීඩකයාට හිමිවී තිබූ අතර දෙවැනි ස්ථානයට රාජකීය විදුහලේ ක්‍රීඩකයකු නම් කොට තිබිණි. එහෙත් බාලිකා අංශය ජයගත් පල්ලේබෝවල මහා විද්‍යාලයේ ක්‍රීඩිකාවට ලබා දී ඇත්තේ තුන්වැනි ස්ථානයයි. එහි සිවුවැනි ස්ථානයට පත්වී සිටින්නේ ද රාජකීය විදුහලේ ක්‍රීඩකයෙකි. මේ අනුව පොදු රාජ්‍ය මණ්ඩලයීය යොවුන් ක්‍රීඩා උළෙලට ක්‍රීඩිකාවක් ඉදිරිපත් නොකොට ක්‍රීඩකයන් දෙදෙනකු පමණක් ඉදිරිපත් කිරිමේ සැලසුමක් ඇතැයි ආරංචි මාර්ග පවසයි.
හඟුරන්කෙත කලාපයේ ඉතා දුෂ්කර ජීවිතයක් ගත කරමින් බොක්සිං ක්‍රීඩාවෙන් ජාතික තලයට පැමිණි මෙවැනි ක්‍රීඩිකාවන්ට ජාත්‍යන්තර කීර්තියක් ශ්‍රී ලංකාවට හිමිකර දීමට ඇති අවස්ථා අහිමිකිරිමට නිලධාරීන් ගන්නා අත්තනෝමතික ක්‍රියා පිළිවෙත් ක්‍රීඩාව පිරිහීමට කරුණක් වී ඇතැයි බොක්සිං ක්‍රීඩා කේෂ්ත්‍රයේ ප්‍රවීණයෝ පවසති.
මේ පිළිබඳ බොක්සිං සංගමයේ ලේකම් මහේෂ් දහනායක මහතාගෙන් ‘දිනමිණ’ කළ විමසුමකදී ඔහු ප්‍රකාශ කළේ පොදු රාජ්‍ය මණ්ඩලයීය යොවුන් ක්‍රීඩා උළෙලේ බොක්සිං තරග ඉසව්වට ශ්‍රී ලංකාව නියෝජනය කරන ක්‍රීඩක ක්‍රීඩිකාවන් සංඛ්‍යාව ප්‍රමාණය ගැන මෙතෙක් අවසන් තීරණයකට එළැඹ නොමැති බවය. කෙසේවුවත් ජාතික ඔලිම්පික් කමිටුවට ඉහත සඳහන් ක්‍රීඩක ක්‍රීඩිකාවන්ගේ නම් ලැයිස්තුව ඉදිරිපත් කොට සිවුදෙනාටම පොදුරාජ්‍ය මණ්ඩලයීය යොවුන් ක්‍රීඩා උළෙල නියෝජනය කිරීමේ අවස්ථාව ලබාදීම තම සංගමයේ අරමුණ වී ඇතැයි ද ඔහු කීවේය. එමෙන්ම ක්‍රීඩක ක්‍රීඩිකාවන්ගේ නම් ලැයිස්තුව බොක්සිං විධායක කමිටුවට ඉදිරිපත් කොට අනුමැතිය ලබා ගැනීමෙන් පසුව එය ජාතික ඔලිම්පික් කමිටුවට ඉදිරිපත් කරන බවත්, ජාතික ඔලිම්පික් කමිටුවේ තීරණයට අනුව අදාළ ක්‍රීඩක ක්‍රීඩිකාවන් තෝරාගන්නා බවත් ඔහු කීවේය. මේ සම්බන්ධව අවසන් තීන්දුව ජාතික ඔලිම්පික් කමිටුව විසින් ගනු ඇතැයි ද ඔහු පැවැසීය.
ජාතික ඔලිම්පික් කමිටුවේ ලේකම් මැක්ස්වෙල් ද සිල්වා මහතාගෙන් කළ අප විමසුමකදී ඔහු සඳහන් කළේ ක්‍රීඩක ක්‍රීඩිකාවන් තේරීමේ දී ජාත්‍යන්තර නිර්නායකයට අනුව දෙපාර්ශවයටම සමානතාව (GENDER EQUALITY) හිමිවිය යුතු බවය. එමෙන්ම පොදුරාජ්‍ය මණ්ඩලයීය යොවුන් ක්‍රීඩා උළෙල නියෝජනය කරන ශ්‍රී ලංකා බොක්සිං කණ්ඩායම ක්‍රීඩකයකුගෙන් හා ක්‍රීඩිකාවකගෙන් සමන්විත විය යුතු බව ඔහු පැවසීය. පල්ලේබෝවල මහා විද්‍යාලයේ ක්‍රීඩිකාවට එවැනි අගතියක් සිදුවී ඇත්නම් ඒ පිළිබඳ සොයා බලා සාධාරණත්වය ඉටු කරන බව මැක්ස්වෙල් ද සිල්වා මහතා කියා සිටියේය.
අදහස් 3ක් ඇත
කරුණාකර සෑම දරුවෙකුටම සමාන අවස්තාවක් ලබා දෙන්න. කුඩා පාසල්වල ළමු
කරුණාකර සෑම දරුවෙකුටම සමාන අවස්තාවක් ලබා දෙන්න. කුඩා පාසල්වල ළමු
ක්‍රීඩිකාවක් තෝරාගෑනීම තුලින් ක්‍රීඩාවේ සමබරතාවය
නව අදහස දක්වන්න