රුසියාවට සම්බාධක පැනවීමේ ඉඩකඩක්

ඉදිරියේදී රුසියාවට සම්බාධක පැනවීම කෙරෙහි අවධානය යොමුවී ඇති බව ඇමරිකානු නව රාජ්‍ය ලේකම්වරයා ලෙස පත්වන රෙක්ස් ටිලර්සන් පවසයි.

ඔහු සඳහන් කර ඇත්තේ රුසියාව කිසිසේත්ම ඇමරිකාවේ සමීපතම මිතුරෙකු ලෙස නොසලකන අතර රුසියාව ජාත්‍යන්තරයට තර්ජනයක් බවයි.

මේ අතර, ඔබාමාගේ පාලනයට වඩා ශක්තිමත් විදේශ ප්‍රතිපත්තියක් අනුගමනය කිරීමට ට්‍රම්ප්ගේ පාලනය පියවර ගනු ඇති බව ද නව රාජ්‍ය ලේකම්වරයා ලෙස පත්වීමට නියමිත රෙක්ස් ටිලර්සන් වැඩිදුරටත් ප්‍රකාශ කර ඇති බවයි විදෙස් මාධ්‍ය වාර්තා කළේ.

මේ අතර සිය වෘත්තිමය ජීවිතයේ සහ පෞද්ගලික ජීවිතයේ රහසිගත තොරතුරු රුසියාව සතුව ඇති බවට පළවන වාර්තා ඇමරිකාවේ ජනාධිපති ධුරය සඳහා තේරී පත් වී සිටින ඩොනල්ඩ් ට්‍රම්ප් කෝපයෙන් යුතුව ප්‍රතික්ෂේප කරයි.

'මහජනතාව අතර ව්‍යාජ පුවත් පතුරවා හැරීමට ඉඩ තැබීම' සම්බන්ධයෙන් ඇමරිකානු බුද්ධි අංශ චෝදනාවට ලක් කරමින් ට්‍රම්ප් ට්විටර් පණිවුඩ නිකුත් කළේය.

තහවුරු නොකරන ලද චෝදනාවලින් පැවසෙන්නේ ට්‍රම්ප් වෛශ්‍යාවන් සමග සිටින ආකාරය දැක්වෙන වීඩියෝ දර්ශන රුසියාව සතු බවය.

එමෙන්ම ඔහුගේ ව්‍යාපාර අවශ්‍යතා කෙරෙහි බලපාන තොරතුරු ද රුසියාව සතු බවට ඇතැම් ඇමරිකානු මාධ්‍ය වාර්තා කොට තිබිණි.

කෙසේවෙතත් ඩොනල්ඩ් ට්‍රම්ප්ගේ රහසිගත තොරතුරු රුසියාව සතුව පවතින බවට පලවන වාර්තා ක්‍රෙම්ලිනය ද ප්‍රතික්ෂේප කළේය.

රුසියාව සහ ඇමරිකාව අතර පවතින ද්විපාර්ශ්වීය සබඳතාවලට හානි කිරීමේ අරමුණින් එවැනි ප්‍රචාර ගෙන යන බව රුසියානු ජනාධිපති වැල්ද්මීර් පුතින්ගේ ප්‍රකාශකයකුවන දිමිත්‍රි පෙස්කොෆ් කියා සිටියේය.


නව අදහස දක්වන්න

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.

Or log in with...