සතුරු සූත්‍රය

සතුරෙක් හෝ මිතුරෙක් හෝ නොමැති මිනිසෙක් මේ ලොව කොතැනකින්වත් සොයා ගත නොහැක. සෙවණැල්ලක් නැති මිනිසෙකු සොයාගත නොහැකි සේම සෑම පුද්ගලයකුටම මිතුරන් හා සතුරන් සිටී. මේ සතුරෝ - මිතුරෝ සංසාරගත බැඳීම් ඇති අය වෙති. සමාජයේ අප හා ගැටෙන කෙනෙක් අතිශයින් ප්‍රියමනාප වේ. තවත් කෙනෙක් නොරිස්සුම් ගති පහළ කරයි. උපන් ලග්නය ඇසුරෙන් සතුරු - මිතුරු පුද්ගලයන් හඳුනා ගැනීමේ නොවරදින සූත්‍රයක් තිබේ. මේ සඳහා ක්‍රමවේද ගණනාවක් පවතින අතර පහත පළවන්නේ එයින් එක් ඉතාම සරල ක්‍රමවේදයකි.

මේ සඳහා පළමුවෙන්ම දුෂ්ට ස්ථාන හඳුනා ගත යුතු ය. ඕනෑම පුද්ගලයකුගේ කේන්දරයේ 6 – 8 – 12 - භාව (කොටු) වලින් දුෂ්ට ස්ථාන පෙනේ. 06 - සතුරු හා රෝග ස්ථානය වන අතර 08 වැන්න මාරක ස්ථානය වේ. 12 වැන්න සියලු වැයවීම් - විනාශය ආදිය පෙන්වයි. මේ සිද්ධාන්තය මත එක් එක් ලග්නයන්ට සතුරු ලග්න හඳුනාගත හැකිය.

සතුරු ලග්න

1. මේෂ ලග්නයෙන් උපන් අයට

කන්‍යා - වෘශ්චික - මීන යන ලග්න සතුරු වේ.

2. වෘෂභ ලග්නයෙන් උපන් අයට

තුලා - ධනු - මේෂ යන ලග්න සතුරු ය.

3. මිථුන ලග්නයෙන් උපන්නේ නම්

වෘශ්චික - මකර - වෘෂභ යන ලග්න තුන සතුරු රාශිවේ.

4. කටක ලග්නයට

ධනු - කුම්භ - මිථුන සතුරු ය.

5. සිංහ ලග්නයෙන් උපන් අයට

මකර - මීන සහ කටක ලග්න සතුරු වේ.

6. කන්‍යා ලග්නයෙන් උපන්නේ නම්

මේෂ - සිංහ යන ලග්න සතුරු ය.

7. තුලා ලග්නයට

මීන - වෘෂභ - කන්‍යා ලග්න සතුරු වේ.

8. වෘශ්චික ලග්නයට

මේෂ - මිථුන සහ තුලා සතුරු ය.

9. ධනු ලග්නයෙන් උපන් අයට

වෘෂභ - කටක සහ වෘශ්චික සතුරු ය.

10 .මකර ලග්නයට

මිථුන - සිංහ - ධනු සතුරු වේ.

11 .කුම්භ ලග්නයෙන් උපන් අයට

කටක - මකර සතුරු ය.

12. මීන ලග්නයට

සිංහ - තුලා - කුම්භ සතුරු වේ.

එක් එක් ලග්න හිමියන්ට තමාගේ සතුරු රාශිවල සඳු ග්‍රහයා ගෝචරයෙන් ගමන් කරන දිනවල දී කායික හා මානසික පීඩාවන්ට ගොදුරු වන්නට සිදුවේ. සඳු ග්‍රහයා එක රාශියක දින 2 ½ ක් ගත කරන අතර ඔබට සතුරු රාශියක සඳු ග්‍රහයා ගමන් කරන දින ලිතකින් බලා ගත හැක. එම දින අසුබය. කිසිඳු සුබ කටයුත්තතකට නොගත යුතුය. එම දිනවල ඔබට කිසියම් හෝ කායික - මානසික පීඩාවක් ගෙනදීම ද නිසැකය. මේ ලෙසම පුද්ගලයන් ඇසුරු කිරීමේදීත් සතුරු ලග්න හිමියන් ඔබට ගෙන එන්නේ පීඩනයකි. ඇතැම්විට සතුරු ලග්න හිමියන් එකිනෙකා සමඟ විවාහ වී වසර 10 – 15 එකට ජීවත්වන අවස්ථා ද දක්නට ලැබේ. එහෙත් එකිනෙකා කෙරෙහි ඇති නොරිස්සුම කෙසේ හෝ ඉස්මතුවීම ද නොවැළැක්විය හැකිය.

දිගු කල් මිතුරු වී සිට බලවත් සතුරන් බවට පත්වන ආකාරය ද අපි අත් දකිමු. කිසියම් පුද්ගලයකුගේ 6 – 8 – 12 යන දුෂ්ට ස්ථාන බලවත් නම්, ඒ ස්ථානයකට ගුරු වැනි ග්‍රහයකුගේ සුබ දෘෂ්ටි ලැබෙන්නේ නම් සහ විශේෂයෙන්ම සුබ ග්‍රහයෙක් එකී ස්ථානයක තැන්පත්ව සිටී නම්, මේ සතුරු පීඩන දුරුවී සුබපල ලැබේ. එහෙත් අසුබ දශා, අතුරු දශා උදා වූ විට සතුරු පීඩනය දිය යට වූ රබර් බෝලය මෙන් ඉස්මතු වන බවත් මතක තබා ගැනීම මැනවි. යම් පුද්ගලයකුගේ 06 වැන්නේ ගුරු වැනි සුබ ග්‍රහයකු තැන්පත් නම් බලවත් නම් ඔහුට සතුරු පීඩා ඉතාම අවම ය. කා සමඟත් හොඳින් ජීවත්වන්නේ එවැනි පුද්ගලයන් ය. එහෙත් සතුරන් නැත්තටම නැති වන්නේ නම් නැත. විවාහය සහ දිගුකාලීන මිත්‍රත්වය සඳහා පුද්ගලයන් තෝරා ගැනීමේදී මේ සතුරු සූත්‍රය ඔබට ප්‍රයෝජනයට ගත හැකි ය.

මෙහි තවත් ප්‍රභේදයක් හඳුනා ගැනීම වැදගත් ය. සතුරු ලග්න වන නමුත් එකී සතුරු ගති යටපත් ව මිතුරු ගති තදින් ඉස්මතු කෙරෙන අවස්ථාවන් ද තිබේ. නිදසුනකට කුම්භ සහ කන්‍යා ලග්න දෙක ගතහොත් මේ දෙක එකිනෙකට සතුරු ය. එහෙත් කන්‍යාව මෙන් ම කුම්භය ද නර රාශි ගණයට වැටේ. නර රාශීන් එකිනෙකට වශී වේ. එහෙයින් සතුරු බල වෙනුවට මිතුරු බල වර්ධනය වේ. මිථුන - කන්‍යා - තුලා - ධනු සහ කුම්භ යන ලග්න හිමියන් එකම ගණයකට අයත් වන හෙයින් දුෂ්ට ස්ථාන ඇසුරින් මතුව එන සතුරු ගති ඉතා අවම වී එකිනෙකා කෙරෙහි මිතුරු හැඟීමෙන් බැ‍ඳෙන බවත් මතක තබා ගැනීම මැනවි.

සතුරු ලග්නයක් නමුත් එය අනෙකාට බලපාන්නේ සතුරාගේ බලය සහ දුෂ්ට ගතිය අනුව ය. නිදසුනකට මිථුන ලග්නය ගතහොත් වෘශ්චික, ලග්න හිමියන් සතුරු වේ.

මිථුන ලග්න හිමියාගේ 06 වැන්න හෙවත් සතුරු ස්ථානයට පත්වන්නේ මේ වෘශ්චික රාශියයි. එහෙයින් මිථුන ලග්න හිමියාට ඉතා තදබල සතුරුකම්වලට මුහුණපාන්නට සිදුවන්නේ වෘශ්චික ලග්න හිමියන්ගෙනි. වෘශ්චික ලග්නයේ අධිපති කුජය. සංකේතය ගෝනුස්සාය. මෙය ජල රාශියක් වන නමුත් එය සමන්විත වන්නේ අධික විෂ රසායනික සහිත දියරයකිනි.

මේ නිදසුනේම අනෙක් පැත්ත බලමු. වෘශ්චික ලග්න හිමියාගේ 08 වැන්න, මාරක ස්ථානය වන්නේ මිථුනයයි. එහෙත් බලවත් ලෙස සතුරුකම් කිරීමට මිථුන රාශිය සූදානම් වන්නේ නැත. මිථුනගේ අධිපති බුධ ය. සංකේතය එකට වෙලුණු මානව රූප දෙකකි. වෘශ්චිකයට සාපේක්ෂව ගත් කල මිථුනය ඉතා අවිහිංසක ය. මේ නිසා වෘශ්චික ලග්න හිමියාට මිථුන ලග්න සතුරාගෙන් එතරම් ප්‍රබල පීඩනයක් එල්ලවන්නේ නැත. ලග්න එකිනෙකට සතුරු නමුත් සතුරාගේ ස්වභාවය අනුව එහි බලපෑම ද වෙනස් වේ.

තවත් සතුරුකම් බලපාන්නේ ඒක පාර්ශ්වීය ආකාරයෙනි. නිදසුනකට කන්‍යා ලග්න හිමියාට සිංහය දුෂ්ට ස්ථානයකි. එහෙත් සිංහ ලග්නහිමියාට කන්‍යාව ධන ස්ථානය වේ. වෘශ්චික ලග්නයට ධනු ද, මේෂයට වෘෂභ ද, මිථුනයට කටක ද තුලාවට වෘශ්චික ද, මකරයට කුම්භ ද නැවත මීනයට මේෂ රාශිය ද ඒ ආකාරයෙන් බලපවත්වයි.

ඔබට සමාජයේ ඇසුරට වැටෙන පුද්ගලයන් සතුරුකම් පාන්නේ කෙලෙසද? ඔබ ඔවුන්ට ප්‍රතිචාර දක්වන්නේ කුමන ආකාරයට ද යන්න වටහා ගැනීමට මේ සූත්‍රය භාවිතා කළ හැකිය. එසේ ම ඉහත පෙන්වා දුන් සතුරු ලග්නවල සඳු ග්‍රහයා ගමන් කරන දිනවල ඉතා පරෙස්සමෙන් සහ ඉවසීමෙන් කටයුතු කිරීමට වගබලා ගතහොත් ඔබට එල්ලවන කායික - මානසික පීඩාවන් බොහෝදුරට වළක්වා ගත හැකිය.

කේ. සී. ජේ 


නව අදහස දක්වන්න

CAPTCHA
This question is for testing whether or not you are a human visitor and to prevent automated spam submissions.
2 + 1 =
Solve this simple math problem and enter the result. E.g. for 1+3, enter 4.

Or log in with...